المساعد الشخصي الرقمي

مشاهدة النسخة كاملة : انا بكرهك - نضال حسن الحاج


ابراهيم محمد بكري
09-17-2011, 04:23 PM
http://www.youtube.com/watch?v=_KeJmVX-QNk&feature=youtube_gdata_player




انا بكرهك
نضال حسن الحاج


بس بكرهك .. انا بكره اليوم الصنع قلباً
يكورك ويندهك

انا بكره الوطن البلم شرف الغرام المنتهك
من ياتوا باب طليت على ما كنت اصلا بشبهك
انا بكرهك

انا شلت ريدك فى القليب وسقيته من دم العروق
صنقعت دليت النجم دنقرت كبيت نور وشوق
وعصرت موية الانتظار ختيته فى وجع الحروق
كان النتيجة تبيع هواى واريتو كان سويتلو سوق
انا بكرهك

من وين اجيب ليك الدموع
من وين اصنقر حيل كلام امنيات قلبه الرجوع
من وين اذا هتك الظلام حيل خيلى القالك شموع
لكنى مجبور اطردك واقفل وراك باب الطلوع
انا بكرهك

شديت رحالاتى ومشيت
وقتين هتك حيلك هواى ارتحت فى موجى ورسيت
لا حرك الموج البحرلا صد قلبي ولا قسيت
لكن طلعته خيال عشم ضمخ رؤى الوجع المميت
انا بكرهك

قدر اشتهاي أنا بكرهك
قدر الغرام الكان زمان كابت مساماتي وهواي
قدر اني ما لوثت بيك كريات شراييني ودماي ..
قدر انى غنيتك غناى

من وين دخلت على مدن شاخت من الوجع الاليم
من وين طرقت جدار قلب لقح هوى العشق العقيم
من وين سخت شمسك على كانت سماى مليانه غيم
فتق جراحاتى وامش خلينى فى لهب الجحيم
انا بكرهك

قدر المواسم الشادة خيل الريد عليك .. أنا بكرهك
قدر المصايب الحارسة بوابات مجيك .. انا بكرهك
نفس المسافة وحجم قلبي الكان تملي بيشتهيك بقى بكرهك

اتوكل ارحل منى فوت
حرمان على قلمى الكلام كان غيرك اجتاحو السكوت
خليهو قلبى الاندفن تنسج عليه العنكبوت
او خلى من بعدك اموت

الموت اخير من انى افضل فى رحابك وفى رجاك
انا كنت لو غاب القمر دايما بضوى ظلام دناك
وانا كنت لو غيمك رحل بطلع عشان اسكن سماك
وانا كنت لو بردك نزل بوقد صوابعى لهيب حداك

لكن منو القدر كده
والله لو انا فى محلك بنسج الشمس احترام واهديها
ليك متمدده
بفتح كراريس الكلام واختار حروفى واجرده
وانبش قبور المستحيل كلمات شكر متفرده

لكن خسارة على قلب حباك بلا مايعرفك
انعل ابو القلم العلى دفتر غناك دمه انسفك
انعل ابو الشعر الغشانى وغنى فيك وألفك
ملعون غناى ما امتطيت خيلى وبقيت اتأسفك
بتأسفك وقتين عيونى يسوقن الشوق لانتظارك
لما ليلى يسوق محاسنه وينهزم عندك نهارك
لما ما ابكى انهزامى عشان ابارك انتصارك
لما كوكبى ساب مدارو ورحل عشان يسكن مدارك
كنت مالي زمان ومالك ..؟
لكن وحاتك بكرهك

ندمان على عمراً معاك ضيعتو فى غفلة زمن
ندمان على دمعاً سكبتو على رضاك بلا تمن
انا كنت بحلم فى وجودك ينكسر خاطر الشجن
لكن رضاى عليك عشم ابليس قصاد جنة عدن
انا بكرهك

كل ما يطول ليلى ويواتيهو العذاب ..انا بكرهك
كل ما القلم يركب مصاعب الدنيا يمشى على الكتاب
انا بكرهك
كل ما الفراق كتل مضامين العشق سدالو باب
انا بكرهك
قدر العيون ما تلبس التوب الزراق تتوضى موية الانتحاب
انا بكرهك

من كل باب انا بكرهك واتوكل ارحل من جواى
غلطان اذا قلبك هداك قال ليك حاتفضل غناى
غلطان اذا عقلك رضخ لى ظن يقول ليك انك هواى

والله مافارق معاى انا كنت ناوى اجملك بس كنت ناوى اجملك
وامسك مضامين اللغات من فيض حروفى اكملك
ترحل على درب العشم بى زاد هواى أحملك
وقتين يخش قلبك جراح اقطع قليبى وادملك

ندمان منو ؟
أنا غايتو ما ندمان عليك ..
أتوكل أرحل براك عيش العذاب الباقى فيك
ولو قلبك اتجرأ رجع .. حقك تلومو على مجيك

عشان انت قليبى مليتو دم
ياخ قلبى انت مليتو دم
ماعاد لو باقى يسيبو ليك
على كل حال انا بكرهك

عدد الحصى وعدد الرمال انا بكرهك
عدد الصواب والاحتمال أنا بكرهك
عدد الحقايق والخيال أنا بكرهك
عدد الشنا وعدد الجمال أنا بكرهك
عدد الشعر ما سن سيف الارتجال أنا بكرهك
عدد الاجابات والسؤال أنا بكرهك
عدد الممكن والمحال أنا بكرهك
عدد ما زمان قت ليك تعال انا بكرهك

مستورة حالى وراك
وفوت يا دابو ليلك همو طال
على كل حال
أنا بكرهك

عايدة سيد احمد
09-17-2011, 04:35 PM
استرسال غريب في بث الكراهية ....رغم ان معظم الشعر جاء حاملا بين طياته الحب الذي كان ولا يزال مصدر إلهام جميع الشعراء .. ليخرجو النفائس والدرر الى البشر من دواخل اعياها الغرام فأشعل القريحة لتجود لنا بجميل البوح ...لله در شعراءنا يقدمون أعذب انواع الشعر في احلك لحظاتهم المعاشه ...اما الكره فمؤكد ان الشاعرة لها من المواقف ما يجعلها تبوح بهذا الشعور العجيب...تحياتي الاستاذ ابراهيم ..وودي

عبداللطيف شوتال
09-17-2011, 08:14 PM
الاخ ودبكرى ..
تحية طيبة ...
تعرف ياصديقى هذه البنت الشاعرة كنت اجلس امام حضرتها طيلة شهر رمضان .. ادمنت عندها شرب القهوة فى برنامجها( قهوتنا ) ..رغم انى لست من اهل الكيف .. فمازلت معجب بما تقول كما انى معجب بطريقة اداءها وكلماتها العادية واشياء اخرى ..
قصيدة الكراهية هذه و كثرة اصناف البغضاء الواردة فيها يدل على خيبة أمل ومغسة مستفحلة فى القلب وتوقعات سالبة دون الطموح ..
خالتنا عائشة ( وهى شاعرة ) .. قالت لطليقها عندما مرت بنفس حالة الاحباط والصدمة التى يحملها النص ..بعد ان قالت فيه من المدح ما لم يقله المتنبى فى سيف الدولة ..
قالت / وهى آسفة ...
غناى القلتو فيك ... كان قلتو فى عود ..
فى برد الشتاء ......... بينفعنى واقود ..
فى اعتقادى هذا تعبيرصادق موجز لخيبة الامل التى عاشتها ..فالتعبيرعن الكراهية والبغضاء عبرالاجيال موجود مع اختلاف الزمان والمكان .. لك الشكر على الاختيار...

عايدة سيد احمد
09-17-2011, 09:20 PM
تحياتي الاخ شوتال ...انا لم انف ان هنالك شعر كراهية ولكن الاسترسال أمر غريب انظر كم تكرر الفعل اكرهك ومما لا شك فيه انها مشاعر دالة على فشل ذريع واحباط ...لك العذر يا شوتال انا شفتها كتير وشاهدت لها اكثر من حلقات فهي تتسم بجرأة إلقاء وثقة عالية بالنفس اضافة لشاعريتها الجذابة...اما خالتك الله يديها العافية .....عموما لكم جميعا التحية بدءا بالشاعرة الجميلة... ومرورا بود بكري .. ووصولا الى سيادتك الاخ شوتال... ودي

عبداللطيف شوتال
09-18-2011, 08:47 AM
الاخت الكريمة عايدة ...
شكرا على ملاحظتك النابهة لدراية الحريم ببعضهن .. نعم انا اتفق معك فى الجرأة الزائدة لدرجة (المرجلة ) التى تلازم الاستاذة نضال رغم مايميزها من ألق وشاعرية .
واذكر انها قالت معللة .. ان والدها كان ينادى عليها لتأكل معهم منذ صغرها.. بينما يأمر بقية أخواتها للذهاب مع الحريم .. فهذه الجرأة والثقة العالية اكسبها لها والدها منذ الصغر واصبحت عادة ملازمة لها .. على العموم فهى حبلى بالقصيد..لك شكرى

ابراهيم محمد بكري
09-21-2011, 07:12 PM
شكرا لك الاخت الاستاذة/ عايدة
شكرا لك اخي الاستاذ/ شوتال
وباقيلكم البوح العجيب دا للشاعرة الاستاذة/ نضال حسن يكون بس ساكت كدي ... الله اعلم ... هل تصدقوا باريت القصيدة بيت بيت قتا اقطعلي منها شي اختو هني لكن لقيت الا اقطعا كلها ...
التحية لكم وللشاعرة/ نضال ...

عايدة سيد احمد
09-21-2011, 07:28 PM
تحياتي الاستاذ ابراهيم .....يعني نتوقع نلقى القصيدة في بوست شاكوش المسيد...الله يستر بس ..