المساعد الشخصي الرقمي

مشاهدة النسخة كاملة : ما راعت شعورك


عثمان محمد وداعه
07-12-2009, 03:00 PM
ما راعت شعورك
حاتم حسن الدابي

*************
مادام هي لا راعت شعورك ولا ضميرها هي استحى
أنساها والبكا مابيفيد قشقش دموعك وامسحا
*****
كلمني شن وداك قبيل تفرد مشاعرك تفضحا
خليتا حي السوق رياض يانعة وزهورة مفتحة
طولت إيدك لي قطوف زهرة وغميصة مسارحا
زي ماهي عاشقي الاغتراب برضو انت عاشق ملمحا
*****
صح كت يامسكين زمان دايما تشكرا تمدحا
مابترضى لو كان بالغلط بي كلمة انسان يجرحا
ما قتا فوق كل البنات تسرق محاسنا تشرحا
كانت عواطف انسان ضعيف ساكت جناحي مجنحة
*****
ان شاء الله منها تتعظ وتكون خطاك تتوشحا
كانت حساباتك غلط في القسمة والضرب اتمحا
اتأنى في جبر الكسور براحة اجمعا واطرحا
واخر شي كان تعرف براك حتى الغرام بقا مصلحة
*****
بت حواء يا مظلومة بقت للمال عقولا ملقحا
يا ريت عقول الناس بعد ما تحب تخش المشرحة
يقروا اللي كان مافي القلوب كيف الشرايين تنضحا
ويتراجع النطقو اللسان صح ولا زي ضل الضحى
*****
مغرورة ما دارت سكون بلدا شقاوة ودردحة
لا تمشي تنزل بي تحت لا حتا ارضك تنقحة
لابوقة لا موية شراب لا واطة ماها مصلحة
لا شلت للمحرات فطور لا شتلة ماها مصفحة
*****
كانت قبيل طمعاني فيك فارس جيوبو متمسحا
دايراك يوم جيت للعرس نار الله في الناس تقدحا
الشيلة بالشنط الكبار مبطوحة راقدي مبطحا
دي الحلي والناس جات تشوف راجين متين تجي تفتحة
كان بالة في شهر العسل طول الزمن ما يبرحة
تسكن معاك في بيت كبير موكيت وحيطو مسلحة
عربيتك الملك الحلال جلد النمر والملفحة
بوتوجاز مولع وديب فريزر وأب ريموت والمروحة
*****
تسرق مناها قبل يتم كل المشاعر تجرحا
يا جعفر الحياة مدرسة دايما مقررة في الصحا
ممكن نعينك في الدروس لو انت غلبك تشرحا
واعرف بانو أول درس الزول بياكل المملحة